Házirgi waqıtta transport tarawında ushırasıp atırǵan mashqalalar, puqaralar tárepinen kelip túsip atırǵan múrájaatlar, xalıqqa sapalı xızmet kórsetiw boyınsha Qońırat rayonında Moynaq, Shomanay, Qońırat hám Qanlıkól rayonlarındaǵı jolawshı tasıw xızmeti menen shugıllanıwshı isbilermenler menen ushırasıw bolıp ótti.

Ushırasıwǵa Qaraqalpaqstan Respublikası Transport ministri P.Kaipbekov, Huqıq qorǵaw uyımı xızmetkeri A.Hasanbaev, Transport qadag'alaw inspektsiyası QR bólimi baslıǵı Á. Sadirbekov hám avtokárxana basshıları qatnastı.

Ushırasıwda házirgi waqıtta «Metan gaz»janılǵı bahasınıń kóteriliwi sebebinen ayırım jónelisler jol haqını kóterip júrgenligi, bul jaǵday jolawshılar arasında narazishılıqlarǵa sebep bolıp atırǵanı, belgilengen jónelis sxeması boyınsha háreketleniw, aqırǵı mánzilge tolıq jetip barıw boyınsha aytıp ótildi.

Sonıń menen birge, jol haqı muǵdarın tiykarsız asırmaw, jolawshılarǵa sapalı xızmet kórsetiw boyınsha qatań tapsırmalar berildi.

Sonday-aq, ushırasıw sońında tasıwshı kárxana basshıları da ózleriniń qızıqtırǵan sorawlarına juwaplar aldı.